Netnotkun

• Tölvupóstur
• Þráðlaust Net
• Samskipti á Neti
• Sprettigluggar
• Leitarvélar
• Verslað á Netinu
• Farsímar og Snjallsímar
• Tölvuleikir

---

Tölvupóstur

Netfang er hægt að fá  í gegnum það netþjónustufyrirtæki sem fólk er í viðskiptum við og einnig er hægt að fá ókeypis netföng á ýmsum vefsíðum sem bjóða upp á póstþjónustu.

Ruslpóstur er óumbeðinn tölvupóstur eða farsímaskeyti sem send eru í fjölpósti t.d. í auglýsingaskyni. Hann ber oft með sér spilliforrit í fylgiskjölum eða tilvísun í vafasamar vefsíður. Varasamt er því að opna skjöl og slóðir sem fylgja slíkum póstsendingum. Oft eru póstföngin sem sent er á fengin af heimasíðum á Netinu eða af póstlistum  en einnig eftir öðrum krókaleiðum. Almenna reglan er sú að öll gylliboð á netinu eru svik

Mjög erfitt er að komast af ruslpóstlista ef þú ert komin(n) á hann. Það borgar sig ekki að hafa samband til baka þegar um ruslpóst er að ræða. Slíkt er aðeins staðfesting á netfangi þínu fyrir þann sem sendir ruslpóstinn. Besta ráðið er að fara varlega með netfangið þitt og nota þær ruslpóstsíur sem standa til boða hjá póstþjónustunni sem þú notar.

Haltu netfanginu þínu eins leyndu og unnt er og gefðu það ekki upp við sölumenn, ókunnuga eða fólk sem þú treystir ekki.

Góð ráð:

• Það getur komið sé vel að vera með tvö eða jafnvel fleiri netföng. Eitt sem einungis vinir og fjölskylda þekkja og annað sem þú getur fengið án endurgjalds hjá alþjóðlegum netþjónustufyrirtækjum. Því netfangi getur þú hæglega eytt og endurnýjað ef ruslpóstur fer að angra þig. Gefðu aldrei upp upplýsingar um þig til ókunnra aðila.
• Þegar ekki er ljóst hver sendandinn er, er betra að eyða póstinum en að frábiðja sér honum sem gerir oft illt verra.
• Kynntu þér alltaf hvort persónuvernd sé virt á þeim heimasíðum þar sem þú gefur upp netfangið þitt.
• Vertu á varðbergi þegar þú heimsækir erlendar vefsíður sem bjóða ókeypis hringitóna og skjámyndir í farsíma en þau geta skráð farsímanúmerin.
• Notaðu öfluga póstsíu sem síar frá ruslpóst.
• Notaðu alltaf sterka/virka eldveggi og öflugar varnir gegn spilliforritum.
• Kynntu þér myndbandið um óboðna gesti, sem er með íslensku tali og fjallar m.a. um Botnet.
• Kvartaðu til Persónuverndar eða Póst- og fjarskiptastofnunar yfir fyrirtækjum og öðrum sem senda ruslpóst.

Við minnum líka á regluna um að opna aldrei viðhengi í tölvupósti frá ókunnugum aðila.

Þráðlaust Net

Heitur reitur er þar sem er þráðlaust háhraða netsamband. Þá er nóg að kveikja á fartölvunni eða snjallsímanum og þá ætti tölvan/síminn að finna þráðlaust net og geta tengst því. Mjög mörg kaffihús á Íslandi og jafnvel heilu bæjarfélögin bjóða upp á heita reiti þar sem notandinn getur vafrað um netið

Samskipti á Neti

Félagsnetsíður. Börn og unglingar nota í síauknum mæli svokallaðar félagsnetsíður eins og MySpace og Facebook til að eiga samskipti við aðra. Á félagsnetsíðum eiga notendur sínar eigin netsíður og tengjast hver öðrum í gegnum síðurnar. Ýmsir nýta sér þessar síður til að koma sjálfum sér á framfæri og því sem þeir eru að gera, t.d. tónlist eða fatahönnun, en aðrir deila myndum með öðrum eða eru saman í umræðuhópum. Hins vegar er þekkt að óprúttnir aðilar noti félagsnetsíður til að komast í samband við börn og unglinga. Þess vegna er mikilvægt að vera vel á verði og kenna börnunum að þekkja hætturnar. Hægt er að stilla hverjir fá aðgang að upplýsingum á síðunum.

Slíkar stillingar eru oft breytilegar og uppfærðar reglulega og því mikilvægt að fylgjast með svo að gætt sé að því hvaða efni fólk hefur aðgang að á síðunni hjá manni.

Sumar félagsnetsíður, eins og facebook, loka sjálfkrafa á ákveðið efni ef notendur eru undir 18 ára aldri.

Blogg: Margir fullorðnir og börn eiga vefsíðu sem er nokkurs konar dagbók á Netinu. Þar skrifa þeir eða blogga um allt milli himins og jarðar, frá daglegu amstri þess sem skrifar bloggið yfir í hápólitíska áróðurs pistla og allt þar á milli.  Mikilvægt er að læra að fara varlega í að dreifa þessum upplýsingum þar sem þær eru öllum aðgengilegar. Oft er hægt að gera athugasemdir við bloggfærslurnar, jafnvel nafnlaust, og þannig er hægt að eiga samskipti á slíkum síðum.

Spjallsíða (chat rooms) flytur stutt textaskilaboð milli viðmælenda á Netinu. Spjall á Netinu er aðferð til að halda uppi lifandi samræðum fólks með því að skrifa texta í ákveðinn glugga í þar til gerðu forriti. Þegar textinn er sendur af stað sjá hann allir sem tengdir eru þeirri spjallrás. Til viðbótar geta flest spjallforrit líka flutt tal og hreyfimynd (með vefmyndavél) af viðmælendum. Spjallherbergin geta verið opin útvöldum eingöngu eða öllum. Sá sem býr til herbergið í upphafi ræður þessu. Flestar rásir hafa stjórnendur sem fylgjast með því sem skrifað er og kasta þeim út sem ekki haga sér sæmilega. Á spjallrásunum notar fólk skjánafn, þ.e. að öllu jöfnu ekki eiginnöfn heldur tilbúin nöfn. Sá sem spjallað er við, er ekki endilega sá sem hann segist vera. MSN er er spjallrás sem flytur stutt textaskilaboð milli viðmælenda á Netinu. Boðin birtast samstundis á skjá þeirra, svipað og SMS skilaboð í farsíma.

Góð ráð

• Ekki leyfa börnum að fara inn á spjallsíður án leyfis. Á sumum félagsnetsíðum er aldurstakmark, s.s. á facebook.
• Vertu viss um að barnið þitt gefi ekki upp persónulegar upplýsingar á netsíðunni sinni og læsi henni.
• Kenndu barninu þínu að hleypa ekki hverjum sem er á síðuna sína.
• Leggðu áherslu á, að efni sem sett er á netið er nær ómögulegt að fjarlægja.
• Kurteisi gildir jafnt á netinu og annarsstaðar.
• Fáðu að skoða þær upplýsingar sem barnið þitt hefur sett inn á síðuna og ræddu við það ef þér finnst upplýsingarnar of  persónulegar.
•  Farðu varlega í að taka við hvers konar gögnum og vefföngum í gegnum spjallrásir, þau geta innihaldið spilliforrit. Ekki opna fyrir að gögn séu send þér sjálfkrafa. Láttu forritið spyrja þig í hvert sinn.
• Gefðu aldrei upp netaðgangsorð, kortaupplýsingar, heimilisfang, símanúmer eða önnur viðkæm gögn til ókunnugra. Jafnvel smáatriði, svo sem nafn atvinnurekanda þíns, geta komið þér illa.
• Vertu á varðbergi, því viðmælandi gæti auðveldlega hafa hagrætt nafni, aldri og kyni.
• Mundu að aðrir geta horft yfir öxl viðmælanda þíns og fylgst með spjalli ykkar

Viðmælandi gæti hafa gleymt að aftengja sig og annar gripið tækifærið og farið í tölvuna. Ef þess er þörf, reyndu þá að fá staðfestingu á hver viðmælandinn er, t.d. með að spyrja um eitthvað sem eingöngu þið eigið að vita. Hver sem er gæti hafa komist yfir aðgangsorð viðmælanda þíns og þóst vera hann.

• Forðastu alltaf að ræða viðkvæm málefni eða gefa upp viðkvæmar upplýsingar. Mundu að samskipti spjallrása (eins og msn) eru ekki dulkóðuð. Þetta táknar að tæknilega er hægt að hlera samskiptin.
• Vertu á varðbergi ef þú færð óþekkta kyrrmynd senda eftir spjallrás, hún þarf ekki endilega að vera af viðmælanda þínum.
• Hafðu í huga þann möguleika að tölva viðmælenda skrái niður allt sem ykkur fer á milli og hægt er að senda það til annarra.
• Taktu burtu þau atriði sem ekki eru nauðsynleg með þínum valstillingum (options) í hugbúnaðinum.
• Nýttu þér þann valmöguleika spjallforrita, að opna eingöngu fyrir samskipti við valda einstaklinga. Þetta er gert með “allow” lista í “options”
• Ekki nota sama aðgangsorð að spjallforriti og þú notar í tölvupósti, netbanka eða til að skrá þig inn á tölvuna þína. Veldu gott aðgangsorð, skiptu því reglulega út og haltu því eingöngu fyrir þig.
• Settu inn endurbætur spjallforrita jafnóðum og þær bjóðast
• Notaðu alltaf sterkan/virkan eldvegg og öflugar varnir gegn spilliforritum

Sprettigluggar

Sprettigluggar (pop-up gluggar) eru skjágluggar sem spretta nýir upp. Þeir eru notaðir t.d. til auglýsinga eða kynningar og geta verið nytsamlegir en innihalda stundum efni sem er ætlað að villa um fyrir fólki. Hægt er að stilla vefsjána þannig að hún hleypi ekki sjálfkrafa sprettigluggum upp (pop-up blocker).  Í Internet Explorer er stillihnappur fyrir sprettiglugga í “Tools” valmöguleikanum.  Í Mozilla Firefox er farið í “Tools”, þar er valinn möguleikinn “Options” þar sem hægt er að haka við val um hvort sprettigluggar eru leyfðir eða ekki. Í google chrome vafranum er farið í ”customize and control google chrome”, svo í ”under the hood” og áfram í ”content settings”.
Þegar valið er að loka fyrir sprettiglugga lætur vafrarinn vita þegar slíkir gluggar vilja birtast og þá er í hverju tilfelli hægt að velja hvort leyfa á þeim að birtast eða ekki. Hnappar í vafasömum sprettigluggum (pop-ups) geta virkjað eitthvað allt annað en þeir segja (t.d. getur NO hnappurinn þýtt YES).

Dæmi um hætturnar við sprettiglugga er þegar netglæpamenn láta sprettiglugga (pop-ups) skjótast upp, og líkja eftir tilkynningu frá virtu fyrirtæki eða stofnun. Þar er tilgreint falsvandamál “sem þarf að leysa” og móttakandinn er beðinn um að smella á veffang heimasíðu, sem er í raun fölsuð eftirlíking af heimasíðu hins virta fyrirtækis.
Einnig eru algengar tilkynningar um að fólk hafi unnið í happdrætti eða lottó og það er beðið um að ýta á takka til að staðfesta að það hafi fengið tilkynninguna.  Slík gylliboð eru algeng aðferð glæpamanna til að nálgast upplýsingar t.d. um kreditkortanúmer.

Mikilvægt er að ýta ekki á valhnappa heldur loka glugganum ætíð með X-hnappinum í rauða svæðinu efst til hægri í glugganum.

Enn öruggara er að ýta samstundis á “Ctrl+Alt+Delete” á lyklaborðinu, velja “Task Manager”, velja “Applications”. Þá birtist listi yfir það sem er í gangi í tölvunni hverju sinni.  Merkið við vefsjána (browser) þar sem sprettiglugginn birtist og ýtið á “End Task”.

Leitarvélar

Leitarvélar eru forrit sem notuð eru til að leita að efni á Netinu.  Dæmi um leitarvélar eru Google, Yahoo, , Leit.is, Já.is (símaskráin á Netinu) og margar fleiri. Flestar leitarvélar notast við orðaleit.  Þá er orð slegið inn og leitarvélin leitar að vefsíðum þar sem orðið eða orðasametningin kemur fyrir.  Þegar fleiri en eitt orð er slegið inn leitar vélin að öllum vefsíðum þar sem eitthvert orðanna eða öll koma fyrir. Hægt er að gera leit markvissari með því að setja gæsalappir utan um orðasamsetningu. Leitarvélarnar sjálfar eru flestar öruggar og  vinsælar leitarvélar eru í stöðugri endurnýjun. Þær eru oft fjármagnaðar með auglýsingum og þess vegna er mikilvægt fyrir fyrirtækin sem reka þær að sinna stöðugum endurbótum.

Eigendur vafasamra vefsíðna gefa þeim oft nöfn sem líkist einhverju sem mikið er leitað eftir og reyna þannig að tæla fólk inn á síður sínar. Það ber að varast.

Verslað á Netinu

Ef vörur eru keyptar á uppboðsvef þarf að hafa varann á og kanna vel þær upplýsingar og meðmæli annarra um þann sem þú hyggst eiga viðskipti við. Einnig spyrja seljandann spurninga áður en kaupin fara fram og ekki opna tölvupóst sem virðist koma frá uppboðsvefnum nema þú sért viss um að hann sé ófalsaður. Gott er að kynna sér algengar aðferðir tölvuþrjóta á uppboðsvefjum til að geta verið betur á varðbergi þegar uppboðsvefir eru notaðir.Netviðskiptum fylgir mikil hagræðing en þarfnast aðgæslu, því ýmsar hættur eru fyrir hendi. Það gilda svipaðar reglur og þegar keyptar eru vörur á uppboðsvef. Kannaðu þér vel þær upplýsingar og meðmæli annarra um þann sem þú hyggst eiga viðskipti við.

Þegar gefa þarf upp aðgangsorð, greiðslukortanúmer, PIN númer og aðrar viðkvæmar upplýsingar á Netinu er mikilvægt að gæta varúðar og forðast viðskiptavefi sem virðast ótraustir. Undantekningarlaust ber að dulkóða (encrypt) IP samskiptin til að koma í veg fyrir að aðrir geti “hlerað” hvaða viðskipti er verið að gera. Hægt er að sjá hvort dulkóðun í netsamskiptum er virk á þrennan hátt;

• Á undan veffanginu í stiklurönd (address bar) efst í vefsjánni kemur fram HTTPS í stað HTTP
• Neðst í Internet Explorer útg. 6.0 er stöðulína (status bar) með gulum lás í lokaðri stöðu, í útgáfu 7.0 er lásinn efst.
• Í Internet Explorer útg. 6.0 má velja “file”, “properties” og skoða “connection”. Í útg. 7.0 er valið “Page” og “Security Report”.

Forsenda fyrir dulkóðun er að þinn viðskipafélagi hafi fengið fullgilda rafræna vottun (digital certificate), sem jafnframt er sönnun þess að fyrirtækið eigi það veffang sem viðskiptin fara fram á. Almennt eru bankar og aðrir viðurkenndir aðilar með slíka löggilda vottun en dæmi eru þó um að Netsvindlarar hafi komist yfir slíkt. Mikilvægt er að kanna vottunina s.s. það veffang sem vottunin er gefin út fyrir, hvaða fyrirtæki fékk vottunina, gildistíma og hver vottaði. Hægt er að kanna vottun á tvo vegu,

• Ef tvísmellt er á fyrrgreindan gulan lás og valið “view”. Þó ber að varast að tæknilega er hægt að falsa eftirlíkingu af slíkum lás á sjálfri vefsíðunni rétt fyrir ofan stöðulínuna og virkja allt annað ef smellt er þar.
• Í Internet Explorer útgáfu 6.0 er öruggara er að athuga eiginleika síðunnar; velja “file”, “properties” og “certificates”. Í útg. 7.0 er valið “Page” og “Security Report”.

Rétt er að varast vottun með gamla tímasetningu á vottun þ.e. eldri en tvö ár. Það er undir okkur komið hvort við treystum uppgefinni vottunarstöð. Breytilegt er hversu vel þær yfirfara og kanna upplýsingarnar í þeim umsóknum sem þær afgreiða. Að lokum þarf hver og einn að gera það upp við sig hvort öllu er óhætt.

Góð ráð:

• Ekki kaupa vörur sem auglýstar eru í óumbeðnum auglýsingapósti (ruslpósti).
• Versla aðeins við viðurkennd netsölufyrirtæki
• Velja eingöngu öruggar vefsíður þegar þarf að slá inn kreditkortanúmer og aðrar persónuupplýsingar
• Varastu viðskipti á þráðlausum tengisvæðum (hot spots)
• Stundaðu ekki viðskipti við neina aðila nema þá sem nota dulkóðun samskipta og eru með gilda rafræna vottun
• Hafðu varann á þér ef þú færð upp glugga sem segir að vottuninni sé ekki í lagi en þér er gefinn kostur á að samþykkja hana samt sem áður
• Kynntu þér góð ráð um aðgangsorð
• Aukið aðgangsöryggi inn á vefsíður fæst með t.d rafrænum skilríkjum, auðkennislyklum eða auka aðgangsnúmer sem sumar vefsíður senda í skráð farsímanúmer með SMS
• Góð regla er að forðast viðskipti við ótrygga aðila á Ebay. Ágæt þumalputtaregla er að forðast viðskipti við aðila sem hafa átt þar viðskipti sjaldar en 10 sinnum (feedback score). Afar miklu máli skipti að meðmæli þeirra að séu mjög góð t.d. milli 99,7-100% (positive feedback).
• Best er ef annar viðurkenndur aðili en sá sem þú átt viðskipti við tekur á móti greiðslukortaupplýsingum, t.d. PayPal. Greiðslan fer í gegnum milliliðinn og hinn aðilinn sér aldrei kortanúmerið þitt, þótt hann fái greiðsluna
• Þótt samskiptin séu dulkóðuð og við treystum vottuninni, er samt sem áður mikilvægt að kynna sér reglur um friðhelgi á vefsíðunni (privacy policy), þ.e. hvað fyrirtækið gerir við þær upplýsingar sem því berast
• Til öryggis skaltu loka vefsjánni eftir viðskipti, frekar en gera “logout” eða “hætta”. Þetta á sérstaklega við um tölvu sem margir nota.
• Hafðu í huga að 128 bita dulkóðun er töluvert öflugri en 64 bita
• Útilokaðu að nota megi aðra útgáfu af SSL en útgáfu 3.0 í vefsjánni sem veitir besta öryggið
• Kynntu þér góð ráð gegn Netsvindli, m.a. “Man-in-the-middle” stýringum
• Vertu meðvitaður um hættur samfara notkun á Netbönkum
• Notaðu alltaf sterka/virka eldveggi (firewall) og öflugar varnir gegn spilliforritum

Farsímar og snjallsímar

Mjög mismunandi er á hvaða aldri börn fá farsíma og þróunin hefur orðið sú að sífellt yngri börn eru með farsíma. Það er foreldra að ákveða og meta hvenær þeir treysta börnum sínum fyrir því að eiga síma og nota þá. Foreldrum ber að kenna börnum ábyrga farsímanotkun. Mikilvægt er að það sé samkomulag milli foreldra og barna um notkun og reglur varðandi farsíma og þeim sé fylgt eftir. Hægt er að fara á Netið í mörgum farsímum og erfiðara er að fylgjast með notkun þeirra síma. Ráðlegt er að ung börn fái ekki slíka síma.

Góð ráð varðandi farsímanotkun:

• Skólar setji skýrar reglur um notkun farsíma í skólunum og á skólalóðinni.  Mikilvægt er að bæði börn og foreldrar þekki reglurnar og virði þær í hvívetna. Ef börnin fá að fara með símana í skólann er mikilvægt að kenna þeim að annaðhvort slökkva á símanum eða taka hljóðið af.
• Foreldrar komi sér saman um notkunarreglur í vinahóp barna sinna eða innan bekkjarins bæði þegar kemur að netnotkun og farsímum.
• Símanotkun tekur athyglina frá umhverfisnu. Því er mikilvægt er að fylgjast vel meðumhverfinu þegar talað er í síma, sérstaklega við umferðargötur. Ekki á að tala í síma eða senda sms þegar verið er að hjóla eða ganga á götum úti.
• Farsímanotkun er ekki alls staðar heimil. Af þeim sökum þarf stundum að slökkva á símanum, svo sem í kennslustofu, flugvélum, leikhúsum og bíósölum, til þess að koma í veg fyrir truflun.

Tölvuleikir

Tölvuleikir eru ýmist á diskum sem keyptir í verlsunum og diskurinn settur í tölvuna og hægt er að spila leikinn án þess að vera nettengdur, leikir á Neti eða í síma. Netleikur krefst sítengingar við netið til að hægt sé að spila hann. Í því felast ekki eingöngu leikir sem fara fram á internetinu heldur einnig þeir sem spilaðir eru á leikjastjórnborðum, í farsímum eða á jafningjaneti. Sumir tölvuleikir á Neti eru þess eðlis að þeir eru spilaðir við aðra einstaklinga. Þessir einstaklingar eru oft undir dulnefni og geta auðveldlega villt á sér heimildir.

Farsímaleikir eru tölvuleikir sem spilaðir eru í farsíma. Stundum er nafnið notað um sms leiki sem eru þó yfirleitt einfaldlega einskonar happdrætti eða  leikir þar sem þátttaka er staðfest með sms skeyti. Farsímaleikir geta boðið upp á möguleika á spili eða samskiptum við aðra farsíma og/eða netnotendur.

Mikilvægt er að foreldrar setji viðmið hvað varðar tíma og tímasetningar sem börn eru í tölvuleikjum og því sé fylgt eftir.

Góð ráð varðandi tölvuleikjanotkun:

• Tölvan og tölvuleikri mega ekki taka tíma frá námi.
• Mikil tölvu- og tölvuleikjanotkun getur breytt samskitpamynstri við vini og fjölskyldu. Minni félagssamskipti samfara auknum tíma sem varið er í tölvuleiki getur verið vísbending um að setja þurfi ný viðmið.
• Fylgist með hvaða tölvuleiki börnin eru að spila og hvort þau eru í samskiptum við einhverja ókunnuga í gegn um leikinn.

Merkingar á tölvuleikjum: Aldursflokkunarkerfi Pan European Games Information (PEGI) er samevrópskt flokkunarkerfi til að setja aldursmörk fyrir gagnvirka leiki. Kerfinu er ætlað að tryggja að ólögráða börn fari ekki í leiki sem eru ekki við hæfi þeirra aldurshóps. Kerfið nýtur stuðnings framleiðenda á leikjatölvum, þar á meðal PlayStation, Xbox og Nintendo, sem og útgefenda og þróunaraðila gagnvirkra leikja um alla Evrópu. Evrópusamtökin um gagnvirkan hugbúnað (Interactive Software Federation of Europe, eða ISFE) þróuðu flokkunarkerfið. Kerfið nýtur dyggs stuðnings framkvæmdastjórnar Evrópusambandsins, sem telur það vera fyrirmynd að samhæfingu á sviði barnaverndar í Evrópu. Aldurshópar PEGI eru 3+, 7+, 12+, 16+ og 18+. Mikilvægt er að skoða merkingarnar og kaupa eingöngu leiki sem henta bæði aldri og þroska barnsins. Góð regla er  að fá leyfi forráðamanna áður þú gefur tölvuleiki í t.d. afmælis-eða jólagjafir.

Aldursflokkunarkerfið byggir á tveimur aðskildum en samverkandi þáttum. Fyrri þátturinn er aldursflokkun, sem er sambærileg fyrri flokkunarkerfum. Aldurshópar PEGI eru 3+, 7+, 12+, 16+ og 18+Hinn þátturinn í nýja kerfinu eru svonefndir efnisvísar leiksins. Efnisvísarnir eru myndtákn aftan á hulstri leiksins sem lýsa innihaldi hans. Fjöldi efnisvísa getur verið allt upp í sex, allt eftir tegund leiksins. Innihald leiksins er að sjálfsögðu í samræmi við aldursflokkun hans. Smellið hér til að sjá myndtáknin .

Saman gera aldursflokkunin og efnisvísarnir foreldrum og öðrum sem kaupa leiki handa börnum kleift að tryggja að leikurinn hæfi aldri barnanna.

PEGI flokkunarkerfið segir ekki til um erfiðleikastig leikjanna. Leikur sem flokkaður er 3+ er talinn skaðlaus en gæti verið of flókinn fyrir 3 ára börn Viljir þú vita hvaða flokkun gildir um tiltekinn leik, er auðvelt að finna þær upplýsingar í gagnagrunni PEGI. Gagnagrunnurinn sýnir vottunarmerkið og þá efnisvísa sem gilda um leikinn. Hann hefur að geyma upplýsingar um alla leiki sem hafa verið flokkaðir hingað til með PEGI-kerfinu, sem hefur verið í notkun síðan 3. janúar 2003.

Með því að smella hér getur þú skoðað flokkun á einstökum leikjum.